رسالة من نرمين نزار إلى بوب

رسالة إلى بــــــوب 

بوب. ببتسم كل ما بقول الأسم في بالي أو بصوت عالي. بوب صاحبي (صديقي يعني بس انا بكره محاولات أكساب العلاقات شكل بريء بأننا نسميها أسامي معينة أو نبرر تسميتها زي ما انا بعمل دلوقتي بالظبط). بوب صديقي من 13 سنة وشويتين! ياااااااااااه يلا! هي دي الي بيسموها صحوبية عمر؟ أكيد دي. أصل لو مش دي تبقى أيه يعني. بوب الي بعد سنين من معرفتنا, لما أتسأل معرفش أنا ديني أيه لأنه ده عمره ما فرق معاه ولا كان ليه مكان في مناقشاتنا. بوب الي حاولت أحب كل بنت هو حبها و كرهت كل بنت سابها او سابته. الي سمعلي كتير أوي وانا بشكي من مية حاجة وأستحمل كل نزواتي وما قالش حاجة غير "يا إلهي!". علاقتي بيه شكلها ما بتتفهمش قوي في الجزء ده من العالم. كانوا الناس دايما شاكين اننا بنحب بعض علشان كده كانوا دايما مش فاهمين أزاي كانوا بيلاقوا لكل واحد فينا حبيب تاني ويلاقونا لسا مع بعض. صحيح يا أبراهيم هو احنا ما حبيناش بعض أزاي؟ يمكن علشان بنحب بعض جدا

لما انت أتجوزت أنا وصلت الفرح أول واحدة بعد مامتك وبباك وأخواتك. يومها ما كنتش فرحانة قوي لأني كنت خايفة أنه اليوم ده يكون علامة فارقة في علاقتنا واننا مراتك الجميلة ما تعرفش تستوعب صداقتنا. سألت بباك يومها "يا أنكل تفتكر حنفضل صحاب زي ما أحنا؟" فقال بثقة "لا". معلش يا أنكل أنا سعيدة انك طلعت غلطان. فعلا بعدها بعدنا فترة. كان ده طبيعي عبال ما تعملوا علاقات مشتركة وحياة مشتركة. وبعدين ومعرفش بالصدفة ولا عن قصد بقيت جزء من أصدقائكوا المشتركين وعرفت انها أنسانة جميلة زيك لانها قادرة تفهم الصداقة الرائعة الي بينا

عايزة بس أقول لك أنك انت ما بقيتش انتيم بعد أول خمس دقايق لو تفتكر ويمكن أنت علشان كده انتيم لغاية النهاردة. صداقة أتبنت زي كل حاجة جميلة واحدة واحدة وعلى أساس قوي جدا من المشتركات الكتير والأختلافات المعلنة. بتتبضن من السياسة مثلا. طيب يا خويا لما بكرة نتحرم من فنجان قهوة سوا في ديوان لأنك مش محرم ليا حتبقى تعرف انه الله حق. ثم تعالى هنا يا أستاذ. انت مش عضو في أدباء وفنانين من أجل التغيير؟ أراهن انك ما رحتش ولا أجتماع بس برضه ماضي على البيان. (بطلعك لساني أفتراضيا وسامعة ضحكتك مجلجلة) مش ححكي على المواقف الي بينا والنبل الي في تعاملك معايا. علاقتنا عندي أكبر من اني أدقق في تفاصيلها الصغيرة بس حبيت أبعتلك السلام وأقول لك الي وحياة لولو و لولو عمرك ما حتسمعه مني في الحقيقة

النص الأصلي في مدونة نرمين http://alexandriabeirut.blogspot.com/search?q=%D8%A8%D9%88%D8%A8+    

منشورة ايضا في كتابها الجميل إسكندرية بيروت